មន្ត្រីសម្រុះសម្រួលដោះស្រាយវិវាទនៃ អ.ដ.ក. បានចុះដោះស្រាយបញ្ចប់វិវាទដោយជោគជ័យជូនប្រជាពលរដ្ឋដល់មូលដ្ឋាន លើសំណុំរឿងវិវាទចំនួន ៣ ដែលមានភាពប្រទាក់ក្រឡាគ្នា និងមានភាពស្មុគស្មាញ អូសបន្លាយអស់រយៈពេលប្រមាណ ១០ ឆ្នាំ ក្នុងថ្ងៃតែមួយ និងទីកន្លែងតែមួយ
មន្ត្រីសម្រុះសម្រួលដោះស្រាយវិវាទនៃ អ.ដ.ក. បានចុះដោះស្រាយបញ្ចប់វិវាទដោយជោគជ័យជូនប្រជាពលរដ្ឋដល់មូលដ្ឋាន លើសំណុំរឿងវិវាទចំនួន ៣ ដែលមានភាពប្រទាក់ក្រឡាគ្នា និងមានភាពស្មុគស្មាញ អូសបន្លាយអស់រយៈពេលប្រមាណ ១០ ឆ្នាំ ក្នុងថ្ងៃតែមួយ និងទីកន្លែងតែមួយ
————————————
ខេត្តតាកែវ÷ ថ្ងៃអាទិត្យ ទី១៨ ខែឧសភា ឆ្នាំ២០២៥ មន្រ្តីសម្រុះសម្រួលដោះស្រាយវិវាទនៃ អ.ដ.ក. រួមមាន លោក ងន សុខជា និងលោក វ៉ាន់ ប៊ុនថន បានសម្រុះសម្រួលផ្សះផ្សាបញ្ចប់សំណុំរឿងវិវាទចំនួន ៣ ក្នុងថ្ងៃតែមួយ លើករណីវិវាទពាក់ព័ន្ធនឹងកិច្ចសន្យាខ្ចីប្រាក់ចំនួន ២ ករណី និង វិវាទពាក់ព័ន្ធនឹងដីធ្លី ចំនួន ១ ករណី បានដោយជោគជ័យ ជូនប្រជាពលរដ្ឋរស់នៅឃុំជំរះពេន ស្រុកសំរោង ខេត្តតាកែវ។
សំណុំរឿងទាំង៣ នេះ មានភាពប្រទាក់ក្រឡាគ្នា និងមានភាពស្មុគស្មាញ ដែលកើតឡើងតាំងពីឆ្នាំ២០១៦ ដោយកន្លងមក ករណីវិវាទទាំងបីខាងលើ ធ្លាប់ត្រូវបានគូភាគីព្យាយាមរកដំណោះស្រាយដែរ តែនៅមិនទទួលបានជោគជ័យ។ បន្ទាប់មក នៅអំឡុងខែមីនា ឆ្នាំ២០២៥ ករណីវិវាទនេះ ត្រូវបានភាគីម្ខាងដាក់ពាក្យមក អ.ដ.ក. ដើម្បីស្នើសុំសម្រុះសម្រួលស្វែងរកដំណោះស្រាយដោយសន្តិវិធី។
អ.ដ.ក. បានពិនិត្យ សិក្សា ស្រាវជ្រាវដោយយកចិត្តទុកដាក់ និងបានចុះដោះស្រាយបញ្ចប់វិវាទនេះ ជូនប្រជាពលរដ្ឋដល់មូលដ្ឋាន និងបានប្រើប្រាស់ទីតាំងរបស់សាលាឃុំ ដើម្បីធ្វើការសម្រុះសម្រួលផ្សះផ្សាបញ្ចប់វិវាទ ដោយផ្អែកលើឆន្ទៈព្រមព្រៀងរបស់គូភាគី និងដោយឆាប់រហ័ស។
