ឯកឧត្តមបណ្ឌិត ជិន ម៉ាលីន រដ្ឋលេខាធិការប្រចាំការនៃក្រសួងយុត្តិធម៌ និងជាអនុប្រធានប្រចាំការនៃ អ.ដ.ក. បានអញ្ជើញដឹកនាំកិច្ចប្រជុំបច្ចេកទេសលេីកទី២ នៃ អ.ដ.ក.
ឯកឧត្តមបណ្ឌិត ជិន ម៉ាលីន រដ្ឋលេខាធិការប្រចាំការនៃក្រសួងយុត្តិធម៌ និងជាអនុប្រធានប្រចាំការនៃ អ.ដ.ក. បានអញ្ជើញដឹកនាំកិច្ចប្រជុំបច្ចេកទេសលេីកទី២ នៃ អ.ដ.ក.
=================
នៅរសៀលថ្ងៃចន្ទ ១០កើត ខែស្រាពណ៍ ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី៤ ខែសីហា ឆ្នាំ២០២៥ អាជ្ញាធរជាតិដោះស្រាយវិវាទក្រៅប្រព័ន្ធតុលាការ (អ.ដ.ក.) បានរៀបចំកិច្ចប្រជុំបច្ចេកទេសលេីកទី២ នៃ អ.ដ.ក. ក្រោមអធិបតីភាពដ៏ខ្ពង់ខ្ពស់ឯកឧត្តមបណ្ឌិត ជិន ម៉ាលីន រដ្ឋលេខាធិការប្រចាំការក្រសួងយុត្តិធម៌ និងជាអនុប្រធានប្រចាំការនៃ អ.ដ.ក. តំណាងដ៏ខ្ពង់ខ្ពស់ ឯកឧត្តមឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ និងជាប្រធាន អ.ដ.ក. និងដោយមានការអញ្ជេីញចូលរួមពីសំណាក់ ឯកឧត្តម លោកជំទាវ ជាថ្នាក់ដឹកនាំ និងសមាជិកនៃ អ.ដ.ក., ថ្នាក់ដឹកនាំនៃអគ្គលេខាធិការដ្ឋាននៃ អ.ដ.ក. ព្រមទាំងមន្ត្រីសម្រុះសម្រួលដោះស្រាយវិវាទនៃ អ.ដ.ក. និងសិស្សមន្ត្រីសម្រុះសម្រួលដោះស្រាយវិវាទនៃ អ.ដ.ក. ជំនាន់ទី ២ ដែលបានចូលរួមដោយផ្ទាល់ និងតាមប្រព័ន្ធ Zoom មានចំនួនសរុបប្រមាណជាង ៩០ រូប។
នៅមុនការចាប់ផ្តេីមកិច្ចប្រជុំ, អង្គប្រជុំក៏បានធ្វេីការស្មិងស្មាធិ៍គោរពដល់ដួងវិញ្ញាណក្ខន្ធវីរ:កងទ័ពដែលបានពលីជីវិតក្នុងសមរភូមិ ដេីម្បីការពារបូរណភាពទឹកដី ប្រឆាំងនឹងការឈ្លានពានពីបរទេស។
នៅក្នុងកិច្ចប្រជុំនេះ ឯកឧត្តម យ៉ម ផារ៉ូត ប្រតិភូរាជរដ្ឋាភិបាល និងជាអគ្គលេខាធិការនៃ អ.ដ.ក. ក៏បានធ្វើបទបង្ហាញផ្សព្វផ្សាយអំពីការិយាល័យតំណាង អ.ដ.ក. ដែលទេីបត្រូវបានបង្កេីត និងដាក់ឱ្យដំណេីរការកាលពីថ្ងៃទី១ ខែសីហា នេះ និងបានជម្រាបជូនអង្គប្រជុំនូវបញ្ហាប្រឈមមួយចំនួនផងដែរ។ បន្ទាប់មក កិច្ចប្រជុំក៏បានដំណេីរការ ដោយមានការចូលរួមពិភាក្សាលេីវឌ្ឍនភាពការងារ បញ្ហាប្រឈម និងមានការផ្តល់ជាយោបល់ និងចែករំលែកបទពិសោធលេីការដោះស្រាយវិវាទ ដោយថ្នាក់ដឹកនាំ និងសមាជិកនៃ អ.ដ.ក. និងមន្ត្រីសម្រុះសម្រួលដោះស្រាយវិវាទផងដែរ។
មុននឹងបញ្ចប់កិច្ចប្រជុំ ឯកឧត្តមបណ្ឌិតប្រធានអង្គប្រជុំ ក៏បានផ្តល់អនុសាសន៍ណែនាំដល់អគ្គលេខាធិការដ្ឋាន និងមន្ត្រីសម្រុះសម្រួលដោះស្រាយវិវាទនៃ អ.ដ.ក. ឱ្យបន្តយកចិត្តទុកដាក់ក្នុងការរក្សា និងពង្រឹងជំនឿទុកចិត្តរបស់ប្រជាពលរដ្ឋមកលើយន្តការរបស់ អ.ដ.ក. ដោយត្រូវផ្តោតសំខាន់លេីកិច្ចការចំនួន ៣ គឺ៖
ទី១៖ បន្តយកចិត្តទុកដាក់ក្នុងការដោះស្រាយវិវាទជូនប្រជាពលរដ្ឋ ប្រកបដោយភាពត្រឹមត្រូវ និងឆាប់រហ័ស និងការរៀបចំកំណត់ហេតុព្រមព្រៀងបញ្ចប់វិវាទឱ្យបានត្រឹមត្រូវតាមច្បាប់ ធានាបាននូវប្រសិទ្ធភាពក្នុងការអនុវត្ត។
ទី២៖ មន្ត្រីសម្រុះសម្រួលដោះស្រាយវិវាទ ត្រូវបន្តប្រកាន់ខ្ជាប់នូវក្រមសីលធម៌ និងអនុវត្តការងារប្រកបដោយវិជ្ជាជីវៈខ្ពស់ សំដៅរក្សាឱ្យបាននូវគុណតម្លៃនៃ អ.ដ.ក.។
ទី៣៖ ប្រធានការិយាល័យតំណាង អ.ដ.ក. ប្រចាំខេត្តទាំង ៤ នៅភូមិភាគឦសាន្តត្រូវយកចិត្តទុកដាក់ខ្ពស់លេីការផ្តល់សេវាដោះស្រាយវិវាទជូនប្រជាពលរដ្ឋនៅមូលដ្ឋាន ឱ្យបានត្រឹមត្រូវ និងប្រកបដោយប្រសិទ្ធភាព ដោយអនុវត្តតួនាទី-ភារកិច្ចរបស់ខ្លួនស្របតាមលិខិតបទដ្ឋានគតិយុត្តពាក់ព័ន្ធ។
ចុងបញ្ចប់នៃកិច្ចប្រជុំនេះ, ឯកឧត្ដមបណ្ឌិត ជិន ម៉ាលីន ក៏បានផ្តល់កិត្តិយសប្រគល់នូវវិញ្ញាបនបត្រដល់ថ្នាក់ដឹកនាំនៃអគ្គលេខាធិការដ្ឋាននៃ អ.ដ.ក. និងមន្ត្រីសម្រុះសម្រួលដោះស្រាយវិវាទ ដែលបានបញ្ចប់ដោយជោគជ័យនូវវគ្គបណ្តុះបណ្តាលគ្រូបង្គោល ជំនាញសម្រុះសម្រួលដោះស្រាយវិវាទ របស់អាជ្ញាធរជាតិដោះស្រាយវិវាទក្រៅប្រព័ន្ធតុលាការផងដែរ។
