លោកជំទាវ ជា វាសនា រដ្ឋលេខាធិការនៃក្រសួងយុត្តិធម៌ និងជាសមាជិក អ.ដ.ក. តំណាងដ៏ខ្ពង់ខ្ពស់ ឯកឧត្តម ឧបនាយកនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ និងជាប្រធាន អ.ដ.ក. បានអញ្ជេីញដឹកនាំសម្របសម្រួលនូវវគ្គបណ្តុះបណ្តាលគ្រូបង្គោល(TOT) និងជំនាញដោះស្រាយវិវាទបន្ថែម ពិសេសសម្រាប់ដោះស្រាយវិវាទជូនប្រជាពលរដ្ឋរស់នៅតំបន់ជនជាតិដើមភាគតិច និងតំបន់ដាច់ស្រយាល
នាថ្ងៃពុធ ៣ កើត និងថ្ងៃព្រហស្បតិ៍ ៤កើត ខែស្រាពណ៍ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី៧-៨ ខែសីហា ឆ្នាំ២០២៤ នៅអគ្គលេខាធិការដ្ឋាននៃ អ.ដ.ក., លោកជំទាវ ជា វាសនា រដ្ឋលេខាធិការនៃក្រសួងយុត្តិធម៌ និងជាសមាជិក អ.ដ.ក. តំណាងដ៏ខ្ពង់ខ្ពស់ ឯកឧត្តម ឧបនាយកនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ និងជាប្រធាន អ.ដ.ក. បានអញ្ជេីញដឹកនាំសម្របសម្រួលនូវវគ្គបណ្តុះបណ្តាលគ្រូបង្គោល(TOT) និងជំនាញដោះស្រាយវិវាទបន្ថែម ពិសេសសម្រាប់ដោះស្រាយវិវាទជូនប្រជាពលរដ្ឋរស់នៅតំបន់ជនជាតិដើមភាគតិច និងតំបន់ដាច់ស្រយាល។ ក្នុងវគ្គបណ្តុះបណ្តាលនេះ ក៏មានវត្តមាន លោក ហាសា ហ្វឺណាន់ដូ (Harsha Fernando) ជាមេធាវី សន្ធានការី និងជាអ្នកជំនាញចរចាប្រចាំតំបន់ បានចូលរួមជាវាគ្មិនចែករំលែកជំនាញដោះស្រាយវិវាទផ្អែកលើគុណតម្លៃនៃទំនាក់ទំនងរបស់ភាគី និងជំនាញចរចាផ្អែកលើគុណតម្លៃនេះ ដល់មន្រ្តីសម្រុះសម្រួលដោះស្រាយវិវាទ ដែលជាក្រុមការងារអនុវត្តគម្រោងចុះដោះស្រាយវិវាទជូនប្រជាពលរដ្ឋរស់នៅតំបន់ជនជាតិដើមភាគតិច និងតំបន់ដាច់ស្រយាល។ វគ្គបណ្ដុះបណ្ដាលរយ:ពេល ២ ថ្ងៃនេះ ត្រូវបានរៀបចំទ្បេីងដេីម្បីពង្រឹងសមត្ថភាពដល់មន្ត្រីសម្រុះសម្រួលដោះស្រាយវិវាទ ឱ្យក្លាយជាគ្រូបង្គោលជំនាន់ទី១ និងដែលជាក្រុមការងារអនុវត្តគម្រោងខាងលេី សំដៅបង្កេីនសមត្ថភាពមន្ត្រីអនុវត្តគម្រោង ដែលនឹងត្រូវចុះធ្វេីការផ្សព្វផ្សាយ និងបណ្តុះបណ្តាលបន្តលេីជំនាញសម្រុះសម្រួលដោះស្រាយវិវាទ ដល់មន្រ្តីពាក់ព័ន្ធនៅថ្នាក់រដ្ឋបាលក្រោមជាតិ ឱ្យមានសមត្ថភាពជំនាញដោះស្រាយវិវាទនៅមូលដ្ឋានខ្លួនផ្ទាល់ប្រកបដោយនិរន្តរភាព និងប្រសិទ្ធភាពខ្ពស់។ សូមបញ្ជាក់ផងដែរថា គម្រោងចុះដោះស្រាយវិវាទជូនប្រជាពលរដ្ឋនៅតំបន់ជនជាតិដើមភាគតិច និងតំបន់ដាច់ស្រយាល គឺជាគម្រោងមួយដែលបង្កេីតទ្បេីងក្រោមការផ្តួចផ្តើមដោយ ឯកឧត្តម កើត រិទ្ធ ឧបនាយករដ្ឋមន្ត្រី និងជាប្រធាន អ.ដ.ក. ដោយបានគិតគូរយកចិត្តទុកដាក់ដល់ការដោះស្រាយវិវាទជូនប្រជាពលរដ្ឋ ពិសេសជនជាតិដើមភាគតិច និងប្រជាពលរដ្ឋនៅតំបន់ដាច់ស្រយាល សំដៅលើកកម្ពស់សិទ្ធិទទួលបានយុត្តិធម៌ និងធានាបាននូវសុខសន្តិភាព ភាពសុខដុមរមនាក្នុងសហគមន៍ជនជាតិ និងសង្គមជាតិ។
